Struktura organizative e IKAP: rregullohet me ligjin për IKAP- LIGJI NR. 04/L – 221 dhe Rregullorja (ZKM) NR. 01/2023 për organizimin e brendshëm. Sipas rregullores aktuale, IKAP ka Zyrën e Drejtorit Ekzekutiv, dy (2) Departamente dhe katër (4) Divizione, me gjithsej 19 vende pune.
Zyra e Drejtorit Ekzekutiv – Drejtori Ekzekutiv mbikëqyr të gjithë punën dhe aktivitetet e institucionit, duke përfshirë performancën dhe cilësinë e trajnimeve, marrëveshjet e mirëkuptimit, projektet me partnerët vendorë dhe ndërkombëtarë si dhe financat dhe investimet.
Nën menaxhimin direkt janë dy (2) drejtorë të departamenteve dhe një (1) zyrtar/e ekzekutiv/e, ndërsa indirekt janë katër (4) udhëheqës të divizionit.
Departamenti për Planifikim dhe Vlerësim të Trajnimit: Departamenti i Planifikimit dhe Vlerësimit të Trajnimit ka për mision të zhvillojë programe trajnimi me cilësi të lartë për të mbështetur zhvillimin e shërbimit civil dhe administratës publike në përgjithësi. Në kuadër të Departamentit për Planifikim dhe Vlerësim të Trajnimit janë dy (2) divizione:
Divizioni i Vlerësimit të Nevojave për Trajnim dhe Hartim të Kurrikulave;
Divizioni i Menaxhimit të Cilësisë së Trajnimeve.
Numri i të punësuarve në Departamentin e Planifikimit dhe Vlerësimit të Trajnimit është shtatë (7).
Departamenti i Organizimit të Trajnimeve: Departamenti i Organizimit të Trajnimeve është njësi organizative në kuadër të Institutit të Kosovës për Administratë Publike, që ka për mision të ofrojë programe cilësore të trajnimit për të mbështetur zhvillimin e shërbimit civil dhe administratës publike në përgjithësi. Në kuadër të këtij departamenti janë dy (2) divizione:
Divizioni i Organizimit të Trajnimeve për Nivelin Qendror;
Divizioni i Organizimit të Trajnimeve për Nivelin Lokal.
Numri i të punësuarve në Departamentin e Organizimit të Trajnimeve është dhjetë (10).